منتــدى الشـــبابيــة


دردشة ليبية - برامج كاملة -بحوث -شعر -عالم المرأة - مسابقات -قصص وروايات
 
الرئيسيةالبوابةس .و .جبحـثالتسجيلدخول

شاطر | 
 

 مجموعة نكث ليبية

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
عبدو

avatar

عدد المساهمات : 537
نقاط : 15252
السٌّمعَة : 9
تاريخ التسجيل : 29/01/2010
العمر : 33

مُساهمةموضوع: مجموعة نكث ليبية   الإثنين مارس 15, 2010 7:18 pm

مجمـوعـة من النكــت الليبية


واحد سكران طينة امقعمز في الشارع في الليل القي سوادني شاد شكاير كناسة قاله ربي ايصون.


-----------------------------------------------------------------------------

سكران ماشي من قدام عزاء .. حالة وفاء يعني قال الي اهل الميت ما فيش امل يرجـــع.


-----------------------------------------------------------------------------

في شيباني ليبي امشي من سيربح المليــون امش سأله جورج قرداحي قاله من جاي معاك ,,, الشيباني قاله أمـــي ,, امشي جورج قرداحي قاله عنــجد أمـــك ,, يعني بجديات.. قاله الشيباني عنجـــد بـــــوك.



-----------------------------------------------------------------------------

واحد ماشي في الطريق و عنده بيحــو القي واحد عنده مكسمة امشي قاله شنو رايك انديرو افاري ,,قاله صاحب المكسمة تي شنو تحسابني خروف انبدل مكسمة بي بيجــو ,,قاله صاحب البيجــو هادي فيها سر امشي اضرب على الكوفني اطلع مارد قاله برا جيب شاهي و كاكوية... امشي صاحب المسكمة افرح ,, بدلو لي بعضهم,, روح صاحب المكسمة بالبيجـو قالوله اهله يا مهبول اتبدل مكسمة بالبيــجو ,,,قاللهم هادي فيها سر اضرب على الكيفنو جاه المارد قاله جيبلي 2 ليبو و1 مكسمة ,,قاله المارد أسف اختصاصي شاهي و كاوكية بس.


-----------------------------------------------------------------------------

في ثلاث طلبة عندهم امتحانات ,, و هما سينسة مش قارين شي قالو انخشو على البركة و خلاص و اي واحد يعرف حاجة ايقول للثاني المهم جاهم سؤال : كــم عدد ارجل النعجة ,, ما عرفوش ,, اثنين سلمو وراقيهم و واحد اقعد ,, بعد ما تم الوقت ,, قالوله علاش ما قلتناش كم عدد ارجل النعجــــــة,,, قاللهم و الله ما فيها كيف المراقب كان حنبي ما اقدرتــــش انطلعها النعـــــجة


-----------------------------------------------------------------------------

في واحد ماشي و عنده حمار,, القاه صاحبه ,, اقعد يسهوك عليه ,, قاله تعرف يا راس و الله اعرفت الحمار و انت ما اعرفتكش.... قاله عادي ,, الحميـــــر تعرف بعضها


-----------------------------------------------------------------------------

في واحد امشي لي طرابلس القي خلاط امتع عصير قامه و اقعد يفحص فيه ما يعرفاش شنو هوا قال و الله لما نشري واحد و اروح بيه... المهم روح بيه لمنطقته ,, جابه للجماعة حطوه في النص ,, و دارو عليه دورة ,, و يفكرو فيه شنو هوا,, بعد سعتين و الا ثلاث ناض اذكى واحد فيهم على اساس ,, قاللهم و ربي الكعبة ما يطلع الا غسالة شخاشير


-----------------------------------------------------------------------------

قالك سواق تاكسي امركب 2 سكارى ,,ماشي في الطريق اضرب راجل بالسيارة ,, قال لي واحد من السكارى ,, تراه انزل شوفه مات و الا لا ,, انزل السكران ,, قال للسواق تراه قدم شوية ,, تراه توا وخــر ,, خلاص,, تواهكي مات


-----------------------------------------------------------------------------

قالك واحد سرق سيارة وماشي يبي يبيعها,, سرقوها منه , روح لي خوته قالو له بقداش بعتها قاللهم و الله براس مالها

-----------------------------------------------------------------------------

قالك واحد شاف صاحبه يجري ,قاله خيرك شن فيه قاله صاحبه مراتي صارلها تسمم واكلة خمسة كيلو حوت,,قاله و انت ماشي بأتجيبلها الدكتور ,,قاله لالا بنمشي انجبلها خمسة كيلوا ثانيات


-----------------------------------------------------------------------------

واحد خش الدكان قاله عندك سكر , قاله صاحب الدكان ايه عندي ,, قاله باهي ربي يشفيك

-----------------------------------------------------------------------------

واحد قالو له شن رايك في الاتيكيت ,,قاللهم باهي ,,لكن المايولكا احسن

-----------------------------------------------------------------------------

واحد مزور الشهادة الثانوية كشفوه , كيف؟؟ كاتب ناجح و منقول لي صف جامعة

-----------------------------------------------------------------------------

واحد كسول قالوله اول ما اتـنوض من النوم شن ادير ؟؟ قال لهم نستريح شوية

-----------------------------------------------------------------------------

في نمر خاطم شاف قطوس يجري في جرت فار قال اصصصصصصص بو حركات الابتدائ

-----------------------------------------------------------------------------

قالك الامريكان طلعو للقمر ,, جاهم واحد هندي : صديق فيه غسيل صاروخ

-----------------------------------------------------------------------------

واحد صاحبنا احدف خطيبته من فوق الجبل , ماتت ,, قاللها واك ما تتحمليش البصارة

-----------------------------------------------------------------------------

سكران قال لي صاحبه السكران الثاني ,, اتصدق انت تشبه الحمار , قاله قول ما شاء الله يا راجل

-----------------------------------------------------------------------------

واحد امشي للصيدلية بيشري دواء لي مراته , روح لاقاها ماتت , قال : شوف السخيفة

-----------------------------------------------------------------------------

فاش منعاشك شاع معناشك عيش منشانك سكران يبي يقول عاش من شافك

-----------------------------------------------------------------------------

قاللك مرة واحد اطرش شاف جنان جيرانهم لقا فيه دجاجة سمينة عجباته تانى يوم انقز من السور ودبحها وكلاها ... بعدها بيوم جاى طالع من الحوش . قاله ولد جيرانهم (صاحب الدجاجة) قاله صباح الخير
الاطرش على طول رد عليه قاله( اي دجاجة؟؟)




عشر أسباب ليش الولد أحسن من البنت !!!!!!!!!!
• تقدر تكمل مكالمتك في ثلاتين تانيه (مش ساعتين و نص لوقني).
• مش تسافر مدة عشرة ايام ترفع شنطه وحده بس (مش اربعطاش شنطه احجام و انواع).
• لما تغير محطاط التفزيون متوقفش عن كل لقطه فيها ولد يبكي(حشيشتهم الشماته مش مشاعر حساسه ).
• مترفعش معاك شنطه فيها عجائب الدنيا (تلقى شنطتهم اتقول دولاب امهني ).
• تقدر ادوش و توتي روحك في عشره دقايق (مش ربع يوم) .
• بتلاتين دينار تشري لبسك كله (مش راتب شهرين)
• طق عمرة الثلاتين عادي (اما هي تعنس في اربع و عشرين)
• حتى لو اوصل عمر الاربعين يقولو عادي عازب مدورش (هي حي عليها حي الكلام يكتر ).
• الشيب يعطيك شخصيه (و هي تبدى في طلييط الحنه و الصبغات).


-------------------------------------------------

واحد ماشي من الشارع يسمع في التخبيط (طاق طيق )اوصل لي نهاية الشارع القي الجماعة يلعبو في كارطة بالزينــقوات
-------------------------------------------------
واحد طاح من فوق الحيط قالوله جاتك سليمة قاللهم قوللها اتخش المربوعة توا انجي
-------------------------------------------------
سكران طاح من فوق عمارة قالوللــه لاباس شنو صار قاللهم و الله ما ني عارف حتى اني كيف واصل
-------------------------------------------------
واحـــد قتله الابلة ارسم فيل امشي ارسملها نقطة, قتله وين الفيـــل يا ولد ..قاللها ما اتشوفيش فيه جاي من بعيد
-------------------------------------------------
في مصري امشي للجزار قاله اعطيني لحمة بجنيـــه قاله الجزار هاك الحس الشيـــــتة
-------------------------------------------------
فيه ابلة تشرح للطلبة درس الاتحاد قوة امشي نوضت طالب اسمه ابو عجيلة ..قالت توا بنعطو لي بوعجيلة عصى وحدة بكسرها ,,طربق بوعجيلة العصى,,قالت توا بنعطو ابو عجيلة عصاتين مع بعض,, طربق بوعجيلة العصاتين ,,,بعدين قالت توا بنعطو بوعجيلة الحزمة كلها ما يقدرش ايكسرها ,,,امش طربق بوعجيلة الحزمة كلها,,,قـتله افلقــت الدرس يا بوعجيلة
-------------------------------------------------
واحد قال لي بوه اعطيني خمسة دينار بأنديــر دورة ,,,, قالــه خود دينارين و قص قصــان
-------------------------------------------------
في واحد عنده دجاج ما ايدحيش بكل ,, جاهم يوم متكنطي قال غضوة الي ما نلقهاش امدحية على اقل خمسة دحيات بندبحها ,, اليوم التاني جي شاف الاولى القي تحتها ستة شاف الثانية الي تحتها سبعة شاف الثالثة الي تحتها وحدة ,, كيف جاب الموس بي ايجر عليها ابدت اتصيح اتقوله,,, اني سردوووووك سردووووك ديــك مش دجاجة
------------------------------------------------
واحد عنده دجاج ماشي بيه من منطقة معينة لي طرابلس و هوا ماشي وقفوه البوابة الاولى ,,, شنو عندك ,, قاللهم عندي دجاج ,, شنو اتوكل فيه قاللهم شعير ,, قالوله يا حمار اتوكل في الدجاج الشعير و الناس مش لاقية تاكل ,, اعطوه طريحة قريب قتلوه,, جي من البوابة الثانية شنو عندك ,, عندي دجاج ,, شنو اتوكل فيهم .. قاللهم كناسة ,, قالوله اتوكل في الدجاج الكناسة بعدين اتبيع فيه للناس ,, عطوه طريحة ,,, جي للبوابة الثالثة , قالولـه شنو عندك ,,, قال دجاج , قالوله شنو اتوكل فيه ,, قاللهم من الاخير نعطي فيه في مصرو ف و يمشي يشري بروحه
-----------------------------------------------
في واحد امشي للعيادة عنده سن فيها سوسة امشي قال للدكتور و النبي حولهم كلهم و خليها بروحها زي الكــلبة
-----------------------------------------------
في واحد مرته حامل مشي قال كاني جاني ولد بأنسميه مبروك,, امشي مراته جابت ولد ,وجت الممرضة اتفرح فيه قتله الف الف مبـروك قاللها قمــطي و حطــي في الســـيارة
----------------------------------------------
في واحد ماشي يدهور في طرابلس امشي طاح تيزتانه يعني محفضة,,, امشي للمركز قاللهم راح تيزتاني فيه الف دينار,,, امشي اعطوه الف دينار تعويض ,, روح لصاحبه قاله اضحكت عليهم قلتلهم ديزتاني فيه الف دينار و راح اعطوني الف دينار امشي صاحبـــه للمركز قاللهم تيز تاني راح معاش القيته,,,, قالولــه شنو كان فيه ,,, قاللـــهم ــــ حــوازة و حــــوش على دورين
-----------------------------------------------
في مرأة ديما اتعيط على راجلها .. في بيت بوي ديما نمشي للسوق في بيت بوي ديما نشري في دبش ,, شاديتله ساعة بيت بوي ,,, بيت بوي,, اتعقد منها ,, قاللها و النبي هيا بدلي دبشك ,, قتله وين للســوق ,, قاللها لالا ,, لي بيت بــوك .
-----------------------------------------------
واحد اعمى ماشي للعرس ارفع مع ولده قاله كان الجماعة يأكلو بسرعة انخصني بيش نلحقو معاهم,, مشي الاعمي قعمز مع جماعة بدالي و طرحات ,, اقعد الاعمى ياكل بسرعة, الولد اتحشم ابدي ينخص في بوه ,, و الشيابني طايح ليه ليه و الولد بنخص,, امشي الشايبني لوح الكاشيك و قام الصونية ,, قاللهم تي غيـــر صلو على النبي يا جماعة .
-----------------------------------------------
في طالب قالت له الابلة جيب بــوك .. امشي جي بوه قال لي الابلة خيره ولدي ,, قالت له ولدك حمار غبي ما يعرف شي,., قال لها كيف ولد ذكي ,, قالت نسأله سؤال كان جاوب ولدك ذكي ,, قالت للولد عدي دور عليا لوطى ,, امشي الولد دور دور و ارجع،،ـ قاللها يا ابلة دورت عليك في المسرح و حجرة المدرسات ما القيتكش ,, اتلفت له بوه و ضربه كف .. قال له تي عدي شوفها في الادارة يا حمــــار .
-----------------------------------------------
في فصل كله حمير و اغبياء ,, امشي قالت الابلة من ايقولي جملـــة اسمية,,,ناض الفلتة فيهم على اساس
قال لها البـــكندا يشرب الشاي قات له شاطر قمعز امشي قالت من ايقول جملة تانية ناض نفس الطالب قال ل ها: البـــكندا يشرب الشاي ,, قالت تي مش قلتها توا هادي قاللها لالا هادي الطاسة الثــانيــة
-----------------------------------------------
ابلة سألت طالب قالت له ,, عندك دينارين و نص و خدي منك خوك دينار ,,, كم يقعد عندك,,, قاللها ما يقعد عندي شي ,, قتله كيف قاللها و الله ما يقعد عندي حاجة ,, قتلها توا بتعرف الحساب احسن مني قاللها توا انتي بتعرفي خوي احسن مني ,,
-----------------------------------------------
في واحد ناض من النوم القي ايده زرقاء امشي للدكتور ,, قاله هدا ورم خبيث لازم انقصو ايدك ,, قاله باهي.. امشي الدكتور قصله ايده تاني يوم ناض الراجل الي رقبته زرقاء ,, امشي للدكتور نفسه ,,, قاله لازم انقص رقبتك .. قاله الراجل شنو هوا تي برا يا راجل,, امشي قال احسن برنامج نمشي انعالج برا خيرلي ,, امشي سافر برا امشي للدكتور .. قاله نوضت من النوم القيت رقبتي زرقاء شافه الدكتور ,, قاله برا اغسل رقبتك .. طالــقة عليها رقبة السورية
-----------------------------------------------
في دكان ايبيع في السلع المحلية بدون ما يندري عليه الحرس البلدي ,, المهم مرة جت ازمة طماطم في البلاد ,, الدكان ازحم زحمة صح ,, و حاط الطمام فوق في اخر رف و السقف عالي,, المهم جي الاول قاله اعطيني حكة طمام ,, جابله و انزل ,, الي بعده قاله اعطيني حكة طمام ,, اركب جاب و انزل ,, الي بعده نبي حكة طمام ,, صاحب الدكان قاللهم ليش التعب ماهو قولو مع بعضكم و اني فوق ,, اركب و قال للرابع شنو حتى انت تبي حكة طمام ,,قاله لا ,, امشي انزل .. قاله املا شنو تبي ,, قاله الرابع اني نبي حكتين مش حكة وحدة
-----------------------------------------------
قالك في اثنين امقعمزين تحت ناطحة سحاب ايشوفو في حاجة نازلة من فـــــوق الجماعة مدت ايديها بي تتلقى ،، يحسابوه شنطة و الا تيزتان... طاح عليهم دولاب
-----------------------------------------------
في واحد هو و ياباني تعاركو ,, امشي اليباني ضربه, ارقد في المستشفى ثلاث ايام بعدها جاه قاله شنو الحركة هادي قاله اليباني حتى تيكواندو,,, المهم امشي واتمرن و جي اتعاركو مرة تانية ,, اليباني اضرب صاحبنا هدا,, ارقد في المستشفى ثلاث ايام ,, بعدها جاه قاله شنو الحركة الجديدة ,, قاله اليباني حتى هيا كاراتي ,, امشي اتمرن و جي .. اتعاركو مرة ثالثة,, صاحبنا اضرب اليباني رقده في العناية ثلاث شهور .. بعدها جي اليباني قاله ما اتقوليش شنو الضربة هادي... قاله هادي لا تيكواندو لا كاراتي ,, حتى هوا كـــريك هونداي
-------------------------------------------------
قالك في منطقة عندهم حفـرة ,,الي يمشي ايطيح فيـها ,, و الطريق من الحفرة للمستشفى بعيدة يعني ما يوصل للمستشفى ,, لين ايودع ,, قالوا لازم نلقوا حل ,, المهم اتلقطوا اذكى اذكيا ئهم ,و ابدوا يفكــرولها ,, بعد عشرة ساعات تفكيـر ,, ناض الفلتة امتعهم ,, قال لهم احسن شي نردمـــوها ,, و نحفروها جنب المستشفى
-------------------------------------------------
قالك في شيباني ,, بيشري سيارة ,, قالو له احسن حاجــة اشري مكسمـة ,,مش عادية بكل ثلاثيـن حصـان ,, اطير طيـران ,, المهم عمك الحويج خاطم في الطريق ,, و يلقى قدامـه صور و ايخش فيه ,, اتلقطوا عليه الناس ,, خير يا حويج لاباس شن صار ,, انزل من السيارة ايعيط الحويج ,, خزيه الشعب الكذاب ,, قالك ثلاثين حصـان ,, ما نقزش منهم و لا حصــان
-------------------------------------------------
قالك واحد امشي لدكتــور نفسي ,, قاله الدكتور خيرك ,, قاله و الله مش عارف يا دكتور الناس ديما ايقوللي يا كلب ,, يا كلب ,, قاله الدكتــور من امتى الكلام هدا ,, قاله من لما كنت جرو
-------------------------------------------------
قالك فيه ضب امشي بيتلاقى ,, مع صاحبه الضب الثاني ,, امشي الضب الثاني جايب معاه خنفوسـة ,, قاله الضب الاول ,, شن هالخنفوسة الي جايبها معاك ,,قاله لا لا,عادي ,, هادي السكرتيرة امتـعي
-------------------------------------------------
قالك واحد مصـري ايعيط على واحد فوق العمـارة ,, ايقوله ارمي الحبل , انت يا قدع يا الي فوق ارمي الحبل ,, امشي جاه واحد قاله انجليزي ما يفهمش فيك ,, كلمه بالانجليزي ,,, قاله المصري اوكي ,, امشي المصري قال لي الراجل الي فوق( دو يو اسبيك انجلش) الراجل قاله يس ,, قاله المصري طب ارمــي الحبــل
-------------------------------------------------
قالك فيه ثلاث صقور ,, امدايرين مسابقة من ايجيب اكبر فريسة ,, الصقر الاول امشي و ارجع منقاره دم ,, قال اتشوفو في الارنب الي تحت الشجرة ,, اني الي اقتلتها توا ,, امشي الصقر الثاني و ارجع ,, ,, وجه دم ,, قال اتشوفو في الغزال الي تحت الشجرة ,, اني الي قتلته توا امشي الثالث و ارجـع ,, كله دم ,, حاله ,, قال لهم اتشـوفو في البالوا الي غـادي ,, قالو له ايـه ,, قال لهم امــه اني ما شفتاش ,, خش في البالوا
-------------------------------------------------
قالك في عشرة امسافرين امريكا ,, يبوا يتعلمو يربطوا الكرواطـة ,, تسعة انخنقوا ماتو و واحد في العنــايــة المشددة
-------------------------------------------------
قالك ابلة اتقري في فصل ,,امشي يوم قاتلهم غضوة كل واحد ايجبلي حيـوان ,, اي حيـوان ثاني يــوم واحد جــاب جده ,, قتله وين الحيـوان يا فرج ,, قلها اهو ,,جدي اكبر تمساح في الشارع
-------------------------------------------------
قالك في واحد انزل يتمــشى ,, القي روحــه على حدود مصـر
-------------------------------------------------
قالك في نفرين امسافرين مصر ,, بالباص متع دورين ,, المهم واحد اركب فوق , وواحد لوطى ,, بعد وقت الي الدور الفوقي ,, نزل راسه ايكلم في صاحبه الي لوطى ,, قاله شنو وين وصلتـوا ,, قاله اهو ,, قريب نوصلوا بوابـة امسـاعد ,, قاله تي باهي امليـح ,,احني سواقنا قاعد ما جــاش يا راجــل
-------------------------------------------------
قالك في شيباني عنده سيارة دلاع ,, ماشي في الطريق على ايميـنه ,و و دوره يكسر طول على يساره ,, و يحشـيها السيارة ,,في سيارة شبيب ,, امشي انزل الشبيب قاله ــ تي خيرك يا حويج مش ادير فليتشـا ,, قاله الشيباني خيرك مش عارف امها ماشيـة للســوق
-------------------------------------------------
قالك في اسـد جي قدام حمــار ,, و يمـنع ,, الحمـار شافـه ,, استغرب ,, المهم الاسد يوقف شوية ,, ايشوف الحمار اشبحله ,, يمنع ,, الحمار استغرب و ايشدها في جـرته و الاسد يجـري و الحمـار في جــرته ,, لين وصلو لي مغــارة الاسد ,, شن طلع ,, قالك الاسـودة يلعبـوا حصـلة في الري من يجيب حمــــار حي
-------------------------------------------------
قالك في واحد سكـران ,, اركب سيارته ,, ما القاش الدومان و الفودرا و البضاعـة ,,استغرب اتصـل بالشرطـة ,, قال لهم السيارة انخنبت,, الفودار و الدومان و البضاعة مهناش,, جوه الشـرطــة ,, القـــوه راكب في السيارة من الكــرسي الخلفي
-------------------------------------------------
قالك واحد شاري سيارة جديدة ,, المهم امشي بيها العمل ,, و هوا نازل ارفع المسجل في ايده و خلى ورقة على مرش السيارة,, الرجاء عدم كسر زجاج السيارة ,, المسجل معي امشي و هوا طالع ,, ما القاش السيارة و القي ورقة على المرشبيدي مكتوب فيها ,, حتى اني نبي الســيارة ما نبيش المسجــل


،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

_________________
الرجوع الى أعلى الصفحة اذهب الى الأسفل
 
مجموعة نكث ليبية
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتــدى الشـــبابيــة :: منتديات الانترنت والتحميلات :: الأنترنت و البرامج والالعاب :: قسم الألعاب والتسالي :: قسم النكت والضحك والفرفشة-
انتقل الى: