منتــدى الشـــبابيــة


دردشة ليبية - برامج كاملة -بحوث -شعر -عالم المرأة - مسابقات -قصص وروايات
 
الرئيسيةالبوابةس .و .جبحـثالتسجيلدخول

شاطر | 
 

 قصيدة مابي مرض للشاعر المرحوم رجب بوحويش المنفي

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
المنفي

avatar

عدد المساهمات : 3
نقاط : 13929
السٌّمعَة : 8
تاريخ التسجيل : 03/05/2010

مُساهمةموضوع: قصيدة مابي مرض للشاعر المرحوم رجب بوحويش المنفي   الإثنين مايو 03, 2010 10:44 pm

مابي مرَضْ غير دار العقيلة.......وحبس القبيلة.....وبعد الجبا من بلاد الوصيله

مابي مرض غير حد المكاد...وشوية الزاد....وريحة اللي مجبّرة بالسواد
الحمرة اللي وين صار العناد...عناتهاطويلة...لها وصف ماعاد تاجد مثيله

مابي مرض غير واجد مرايف ...والحال صايف....علي عَكْرمَة والعَدَم والسّقايف
وحومة لفاوات عزّ العطايف ....حتي وهي مْحِله...تربِّي المهازيل جلَّه خويله

مرايف علي عكرمة والسراتي...اللي هن مناتي...نشكرن ان كام طلتهن في حياتي
عليّ وين يخطرن ننسي اوقاتي...دمعي نهِله...زواعب علي لحيتي سال سيله

مابي مرض غير مطري الحرابي...خيرة اصحابي... الضرابين والكوغط ينابي
ركابين كل حمره دعابي....الطايحتشيله...نضيده رفاقاه قبلوا جميله

مابي مرض غير فقد الرجال....وفنية المال...وحبسة نساوينا والعيال
والفارس اللي كان يقدع المال...نهارة جفيله...طايع لهم كيف طوع الحليله

طايع لهم كيف طوع الوليه ...ان كانت خطيه...نرمي الطاعه صباح وعشيه
نشيل في الوسخ والحطب والمويه...معيشة ذليله...مفيت ربنا يفزع يفك الوحيله

طايع لهم كيف طوع الوصيف...نسيت الوظيف....بعد بقيتي كنت ظاري عفيف
نصبِّي بلا حيل عندي خفيف...نشيل التقيلة...نزازي مزازة من زين حيله

مابي مرض غير فقد الغوالي...أسياد المتالي...سما العضادات فوق العوالي
راحو حساب شي تافه قبالي...ولا لقيت حيله...نشالشبها نين راحو دقيلة

مابي مرض غير طولة لجالي....وضيعةدلالي...وفقدة أجاويد هم راس مالي
يونس اللي كيف صوت الهلالي...كرسي القبيله...امحمد وعبدالكريم العزيله
وبوحسين سمح الوجاب الموالي...والعود ومثيله...راحو بلا يوم ذايب ثقيله

مابي مرض غير فقد الصغار...اسياد العشار...اللي لقطوا كيف تمر النهار
الضرابين للعايب صدار...نواوير عيله...ماينطروا بقول ناسا ذليله

مابي مرض غير شغل الطريق...وحالي رقيق...ونروح وماطاق البيت ريق
وسواطنا قبال النسا في الفريق...وقبينا زطيله...ماطاقنا عود يشعل فتيله

مابي مرض غير ضرب الصبايا ...وجلودهن عرايا...ولا يقعدن يوم ساعة هنايا
ولايختشو من بنات السمايا...بقول يارزيله...وعيب قبح مايرتضي للعويله

مابي مرض غير غيبة افكاري...وبينة غراري...وفقدة ضنا السيد خيوة مطاري
موسى وجبريل سمح السهاري...اسياد الخويله...ماينطروا بقول داروا عويله

مابي مرض غير طولة ريافي...ووثقة كتافي..وصبري بلاكسب ميل الشعافي
وتلايس اللي ع السوايا يكافي..خيار القبيله...عشا للجوارين يحموا كحيله

مابي مرض غير بعد العماله ...وحبس الرزاله...وقلة اللي م الخطا ينشكي له
وغيبة اللي يحكموا بالعداله...النّصْفَه قليله...والباطل علي الحق واخذ الميله

مابي مرض غير خدمة بناتي...وقلة هناتي...وفقدة اللي من تريسي مواتي
ووخذة غزير النصي بوعتاتي...العايز مثيله...يهضوذن علي القلب ساعه جفيله

مابي مرض غير فقدة نواجع ...ونا مانراجع...واللي لفّهن لاجفا لامواجع
ولا ينظروا غير حكم الفواجع... وريقة طويله...ولسان مرشّرّ من ضرب الثقيله

مابي مرض غير قل المحامي...ولينة كلامي...وهينة اجاويد روس ومسامي
وريحة اللي خايله باللجامي ...غريمة الهميله...منقودة التناسيب نقدة الرِّله

مابي مرض غير سمع السّوايا...ومنع الغوايا..وفقدة اللي قبل كانوا سمايا
وبط النساوين طرحي عريا..بسبله قليله...يديروا لهن جرم مافيه قيله

مابي مرض غير قول اضربوهن...ولاتصنعوهن...وبالسيف في شئ خدموهم
ومقعد مع ناس مانعرفوهم...حياةً عوشله..الاَّ مغير ماعاد باليد حيله

مابي مرض غير زمط العلايل..وديما نخايل...علي خيلنا والغلم والشوايل
وخدمة بلا قوت والسوط عايل...معيشة رزيله...علي اثر الدّباويش جوا للعويله

مابي مرض غير فقد الملاح...ودولة القباح...اللي وجوهم نكب واخري صحاح
وكم طفل عصران م السوط ذاح...حاير دليله...يانويرتي صاف من دون جيله

مابي مرض غير كسر الخواطر...ودموعي قواطر....مادونهن من يساطر
الراعي معقل جمال القناطر...فحولة كحيله...وطالق قعادين فوق الخويله

مابي مرض غير حبس المسامي...وميحة ايامي...و"كابو"علي ضرب لجلود دامي
يصبي يناديك بلسان حامي...ولغوة هزيله...تخاف يعدمك قبل لاتشتكي له
وشوخة ردي لصل شَوَّت منامي...حتي وهو عزِيله..يبيعك علي شان حاجة قليله

مابي مرض غير فوت الحدود... ووقاف سود...وشبردق ملوي علي راس عود
لاحيل لاقادرة لاجهود ...لشيل الثقيله...زاهدين في العمر لوجا وكيله

مابي مرض غير برمة افلاكي...وهلبة املاكي...وضيق دار واشونقاعد متاكي
الفارس اللي كان يوم الدعاكي...ذرا للعويله...يساسي ورا قرد مقطوع ذيله
وكل يوم م الظلم نا ننوض شاكلي...ونفسي ذليله...وكيف المرا مانفك العقيله

مابي مرض غير ميلة زماني...وقصرة لساني...ومانحمل العيب والعيب جاني
وتريسي اللي قبل بيهم نقاني...جمال العديله...ثقال روزهم يوم ذايب ثقيله
علي اثر ياسهم روجتي من مكاني...ليله طويله...ظلامها غطا ضي قاز الفتيله

مابي مرض غير فقدة بلادي... وشي من اريادي...نواجع غرب في خيوط السعادي
طالب الكريم اللي عليه اعتمادي ...يعجل بشيله...قبل لايفوتن ثلاثين ليله

الدايم الله راح راعي المجمم....طغي ضي ظَلَّم...العاصي علي طول مايوم سلَّم
لولا الخطر فيه بيش نتكلم...ونعرف نشيله...ونعرف نبين ثناه وجميله

تحياتي
الرجوع الى أعلى الصفحة اذهب الى الأسفل
joory

avatar

عدد المساهمات : 196
نقاط : 14366
السٌّمعَة : 11
تاريخ التسجيل : 24/04/2010
العمر : 30

مُساهمةموضوع: رد: قصيدة مابي مرض للشاعر المرحوم رجب بوحويش المنفي   الثلاثاء مايو 04, 2010 3:58 pm

مشكووور منفي ع هالقصيدة الاكثر من رائعة
و اتمنى لو تعرفنا اكثر ع هالشاعر المبدع علم ليبيا علم ليبيا


عدل سابقا من قبل joory في الجمعة مايو 14, 2010 10:07 am عدل 1 مرات
الرجوع الى أعلى الصفحة اذهب الى الأسفل
الممتاز

avatar

عدد المساهمات : 2
نقاط : 13867
السٌّمعَة : 8
تاريخ التسجيل : 14/05/2010

مُساهمةموضوع: رد: قصيدة مابي مرض للشاعر المرحوم رجب بوحويش المنفي   الجمعة مايو 14, 2010 10:06 am

تسلم ادك علي نقلك لقصيدة وملحمة مابي مرض

وهي اول من بدأ بيها الشاعر المرحوم رجب لحويش
الرجوع الى أعلى الصفحة اذهب الى الأسفل
 
قصيدة مابي مرض للشاعر المرحوم رجب بوحويش المنفي
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتــدى الشـــبابيــة :: منتديات الشعر والأدب :: قسم الشعر وعذاب المحبين-
انتقل الى: